Piamonte izenak definitzen duenez, “mendien oinetan” , mendiz inguratutako eskualdea da. Ordekan dauden lurrak %5 baino ez dira. Mendi-hegal bakoitzeko mahasti bakoitzak bere mesoklima duen arren bertako makroklimaren ezaugarriak hurrengoak dira: Mahatsa hazteko sasoia, udaberri eta uda, beroa da; ondoren udazken hezea eta negu hotza, askotan lainotsua, izaten da.
Nebbiolo mahats barietatea nebbia (laino) hitzetik dator. Laino hau Langhe eskualdeetako tontorretan, Alpe inguruetan, itsasten da udazkenetan. Azal sendokoa denez ardoak tanino indartsuak, intentsitate kromatiko sakona eta aroma sorta zabala ditu: arrosen ukituetatik hasi, liliak, alkaterna, trufak eta erregaliza…
Piamonteko bi ardorik onenek euren herrietako izenak hartu dituzte, Barolo eta Barbaresco. Gainontzekoek mahats barietateen izenak dituzte: Barbera, Dolcetto, Brachetto, Grignolino, Moscato, Freisa, Nebbiolo. Mahatsaren izenaren ondoren eskualde baten izena izanez gero ardoa lursail mugatu batekoa da, teorian, maila goragokoa da.
Nebbiolo mahatsez egindako ardo baten adibide bikaina Barbaresco izanik ere, Barolo da zalantzarik gabe onena. Tanaro ibaiaren bi adar txikik Barolo zatikatzen dute tontortxoz beteriko hiru eremu altutan. Eskualde honetako hamaika herritan egiten da ardo hau. Mendebaldean Barolo eta La Morra nabarmentzen dira. Ardo hauek lurrintsuak eta tentsio gutxiagokoak dira. Eskualde honetako mahasti garrantzitsuenak dira Brunate, Cerequio, La Rocche eta La Serra. Altuera gutxiagoko lurretan kokatzen da Barolo guztiko mahasti ospetsuena, Cannubi.
Ekialderago Castiglione Falletto, Serralunga D´Alba eta Monforte D´Alba herrietan lurra hareazkoa izanik, ez hain emankorra, ateratzen diren ardoak kontzentratuagoak eta indartsuagoak dira, zahartzeko premia handiagoa dute. Elaboratzaileen artean Ángelo Gaja nabermentzea merezi du. Bere familia XVII. mendetik dago Piamonten kokatuta. Laugarren belaunaldia da 1859tik Langhe mendi-hegaletan ardoak produzitzen. Piamonteko ardoetan, mahastizaintzan eta ardogintzan, izan diren aldaketa iraultzaileen bultzatzaile handienetakoa da.